Lavurs
Lur lavurs èn las suandantas:
Preparar las lavurs
- prender encunter incumbensas da superiurs, p.ex. d'installaturs sanitars, da manadras da lavuratoris, da manaders da montascha u da manadras da projects
- gidar a far mesiraziuns sin il plazzal
- dissegnar il plan per ils conducts previs d'aua da baiver e d'aua persa
- calcular la lunghezza dals bischens
- empustar il material
- enconuscher ils privels a la plazza da lavur, p.ex. privel da crudar, substanzas da tissi u contaminaziun da l'ambient
Fabritgar elements
- en il lavuratori gidar a producir ils bischens tenor plan
- tagliar ils bischens sin las lunghezzas calculadas
- montar bischens e tocs da contact, p.ex. cun francar cun struvas, cun fitgar ensemen u cun buglir
- fabritgar e montar simpels sistems da paraids sanitaras, quai èn paraids intermediaras davos las paraids dals bogns, che isoleschan tranter auter cunter canera
- chargiar sin il vehichel il material e l'iseglia per la montascha, p.ex. maschinas da furar u resgias circularas
Montascha
- gidar a francar bischens en las paraids, en ils palantschieus e sin ils palantschieus sura
- colliar armaturas, p.ex. spinas cun ils conducts
- colliar ils conducts cun la rait publica
- isolar bischens, tocs da contact ed armaturas, per ch'i na sa furmia nagina aua condensada
- montar paraids sanitaras prefabritgadas
- colliar u remplazzar indrizs sanitars sco lavabos, duschas u boilers e spinas
- montar accessoris sco fixaziuns per vaider, per palpiri da tualetta u per tendas da duscha
- dismetter en moda ecologica objects vegls u ruts
Scolaziun
Durada
2 onns
Furmaziun en la pratica
En in manaschi per installaziuns sanitaras
Furmaziun en scola
1 di per emna a la scola professiunala spezialisada
Roms professiunals
- planisar las lavurs
- installar conducts da provediment d'aua da baiver
- installar conducts da dismessa
- installar sistems da paraids sanitaras
- montar indrizs ed apparats sanitars
Curs ordaifer il manaschi
Emprender la lavur pratica, approfundar ed exercitar las basas professiunalas, 21 dis durant 2 onns.
Diplom
Practicist sanitar / Practicista sanitara AFP
Premissas
Furmaziun preliminara
- terminà la scola obligatorica
Pretensiuns
- inschign manual
- chapientscha pratica
- agilitad corporala
- sanadad robusta
Furmaziun supplementara
Curs
Purschidas da scolas spezialisadas e da scolas professiunalas spezialisadas, dals centers da furmaziun da suissetec sco er d'interpresas da la branscha da tecnica d'edifizis.
Emprendissadi supplementar
Practicistas sanitaras e practicists sanitars AFP pon per regla far in emprendissadi scursanì sco installatur sanitar / installatura sanitara AFQ. Suenter pon vegnir absolvidas las medemas furmaziuns supplementaras sco per installatur sanitar / installatura sanitara AFQ.
Cundiziuns da lavur
Practicistas sanitaras e practicists sanitars lavuran en manaschis d'installaziun sanitara da differenta grondezza, en manaschis sanitars e da stgaudament ubain en manaschis sanitars e da tolaria. Els lavuran en il lavuratori e sin il plazzal, nua ch'i regia mintgatant gronda canera. Els lavuran en il team e survegnan lur incumbensas d'installaturs sanitars. Els han da far er cun clientella, cun furnituras e cun autra glieud da professiun sco miradurs, installaturas da stgaudaments u tschentaplattas.
Els portan in equipament da protecziun, p.ex. chapellina, guants, chalzers da segirezza, protecziun d'udida ed egliers da protecziun. Lur temps da lavur èn regulars. Mintgatant ston els dentant esser al lieu, sch'i dat problems en la rait da la circulaziun d'aua. Per regla n'èsi betg difficil da chattar ina plazza d'emprendissadi. Suenter l'emprendissadi datti differentas pussaivladads da svilup. Per exempel en il sectur da l'effizienza energetica che daventa adina pli impurtant en la branscha da construcziun.
Ulteriuras infurmaziuns
Associaziun svizra e dal Liechtenstein da tecnica da construcziun (suissetec)
8021 Turitg 1
URL: www.suissetec.ch