Lavurs
Lur lavurs èn las suandantas:
Preparar las lavurs
- prender encunter incumbensas da superiuras e superiurs, p.ex. da tolers, da manadras da lavuratoris, da manaders da montascha u da manaders da projects
- collavurar en cas da mesiraziuns sin tetgs u sin fatschadas
- far skizzas d'elements da stagn e da tola, a maun u digitalmain
- calcular la quantitad dal material ed empustar il material
- endrizzar la plazza da lavur, p.ex. montar puntanadas
- enconuscher ils privels a la plazza da lavur, p.ex. privel da crudar, substanzas da tissi u contaminaziun da l'ambient
Fabritgar elements da construcziun
- gidar en il lavuratori, p.ex. a fabritgar bischens da deflussiun, roms da fanestras u chanals da tetg
- segnar e tagliar tolas, cun agid da maschinas u a maun cun forschs da tola
- storscher, squadrar u smatgar tola en la furma giavischada
- colliar elements, p.ex. cun plegar, struvegiar, tatgar, rebatter u saldar
- chargiar en il vehichel ils elements ed ils urdains sco maschinas da furar u enguttaders
Montascha
- gidar sin il plazzal a montar ils elements sin tetgs e sin fatschadas
- fixar elements vi da la construcziun, p.ex. cun rebatter, saldar u plegar
- far colliaziuns e finiziuns, per che p.ex. il rom d'ina fanestra possia vegnir montà vi d'in mir
- gidar a montar indrizs solars, parachametgs u elements decorativs sco culmainas da cucheras
- isolar elements, p.ex. cun chit
- sortir ruments tenor materials, p.ex. arom u aluminium, e dismetter ils ruments en moda ecologica
Scolaziun
Durada
2 onns
Furmaziun en la pratica
En ina tolaria
Furmaziun en scola
1 di per emna en la scola professiunala spezialisada
Roms professiunals
- planisar las lavurs
- fabritgar elements
- montar elements, profils da tola ed elements finids
Curs ordaifer il manaschi
Emprender la lavur pratica, approfundar ed exercitar las basas professiunalas, 21 dis durant 2 onns.
Diplom
Practicist stagner / Practicista stagnera AFP
Premissas
Furmaziun preliminara
- terminà la scola obligatorica
Pretensiuns
- inschign manual
- chapientscha pratica
- agilitad corporala
- sanadad robusta
Furmaziun supplementara
Curs
Purschidas da scolas spezialisadas e da scolas professiunalas spezialisadas, dals centers da furmaziun da suissetec sco er d'interpresas da la branscha da tecnica d'edifizis.
Emprendissadi supplementar
Practicists stagners / practicistas stagneras AFP pon per regla far in emprendissadi scursanì sco stagner / stagnera AFQ. Suenter pon vegnir absolvidas las medemas furmaziuns supplementaras sco per stagner / stagnera AFQ.
Cundiziuns da lavur
Practicistas stagneras e practicists stagners lavuran en tolarias da differenta grondezza, en manaschis da tolaria e sanitars ubain en manaschis da tolaria e cuvratetgs. Els lavuran en il lavuratori e sin il plazzal, nua ch'i regia mintgatant gronda canera. Els lavuran en il team e survegnan lur incumbensas da stagneras e stagners. Els han da far er cun manadras da construcziun, clients, furnituras ed autra glieud da professiun sco miradurs, constructuras da fatschadas u cuvratetgs.
Sin il plazzal lavuran els da tutta aura en il liber. Els sa movan savens plirs meters sur il funs sin puntanadas e sin tetgs. Els portan pia in equipament da protecziun, p.ex. chapellina, guants, chalzers da segirezza ed egliers da protecziun. Lur temps da lavur èn regulars. Mintgatant ston els lavurar pli ditg per observar termins. Per regla n'èsi betg difficil da chattar ina plazza d'emprendissadi. Suenter l'emprendissadi datti differentas pussaivladads da svilup. Per exempel en il sectur da l'effizienza energetica, che daventa adina pli impurtanta en la branscha da construcziun.
Ulteriuras infurmaziuns
Associaziun svizra e dal Liechtenstein da tecnica da construcziun (suissetec)
8021 Turitg 1
URL: www.suissetec.ch