Lavurs
Installaturs ed installaturas da stgaudaments monteschan, tschentan e collian sistems da chalur che vegnan fatgs ir dad ieli, gas u energias regenerablas. Cun indrizs da stgaudar e conducts garanteschan els per ina repartiziun da chalur optimala en tut las sorts d’edifizis. Latiers resguardan els las perscripziuns da l’ambient e l’effizienza d’energia dals sistems. Ultra da quai controlleschan e reparan els ils indrizs.
Els exequeschan suandantas lavurs:
Planisar las lavurs
- studegiar plans da construcziun e designar skizzas da las parts dals indrizs da chalur
- calcular la lunghezza dals bischens e la quantitad da las materialias che vegnan duvradas
- organisar il transport ed il deposit da las materialias cun maschinas al plazzal
- preparar ils auzaders e segirar il plazzal
Montar sistems da chalur ed installaziuns
- far diever da pumpas da chalur, da la geotermica, da l’aua sutterrana u da l’aria sco funtauna da chalur; montar, isolar e controllar tenor indicaziuns
- installar indrizs solar termics e fotovoltaics, tschentar las lingias da colliaziun tar la pegnà, controllar ils indris e preparar da metter en funcziun las apparaturas
- installar la pegnà per il material dad arder sco stganatschs, pellets u stalizzas, montar la differenta tocca, las lingias per la distribuziun dal material dad arder, montar la dismessa da la tschendra sco er tschentar ils recipients dal deposit en ina localitad protegida
- installar ed attatgar l’avnaun u il tanc dad ieli ed ils indrizs da gas sco er installar il termostat ed ils sensurs
Installar conducts ed armaturas
- tagliar, furmar e metter ensemen u buglir bischens
- colliar las lingias cun ils indrizs, montar armaturas, ventils u cundrizs da segirezza
- montar l’indriz da stgaudament ed ils bischens per il stgaudament da palantschieus tenor plan ed al colliar cun la repartiziun da chalur.
Metter en funcziun ils indrizs
- endrizzar la pressiun, chalur u il current da l’indriz per obtegnair il dretg effect
- controllar la configuraziun e nudar ils resultats
- elavurar rapports da construcziun e surdar e declerar l’utilisaziun dals indrizs a la clientella
Reparar e mantegnair ils indrizs
- demontar, reconstruir u adattar indrizs existents
- chattar ed eliminar sbagls u disturbis, remplazzar parts defectas sco pignas u pumpas
- exequir lavurs da mantegniment tar la clientella
- demontar, sortir e dismetter materialias adattà a l’ambient
- mantegnair guaffens e maschinas
Scolaziun
Durada
4 onns
Furmaziun en la pratica
En in manaschi da la branscha da stgaudaments u en in manaschi maschadà stgaudament-ventilaziuns-installaziuns sanitaras
Furmaziun en scola
1 di per emna a la scola professiunala
Cumpetenzas professiunals
- Planisaziun da las lavurs
- Montascha d'indrizs ed instruments tecnics termics
- Installaziun da lingias ed armaturas
- Montascha da cumponentas che dattan giu chalur
- Messa en funcziun dad indrizs tecnics termics
Curs ordaifer il manaschi
Emprender ed exercitar a moda pratica la basa professiunala. 51 dis durant 4 onns.
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Installatur / installatura da stgaudaments AFQ
Premissas
Furmaziun preliminara
- Temp obligatoric da scola terminà
Pretensiuns
- inschign manual
- enclegientscha pratica
- enclegientscha tecnica
- imaginaziun dal spazi
- movibilitad corporala
- sanadad robusta
- abilitad da lavurar en ina gruppa
Furmaziun supplementara
Curs
purschidas da scolas spezialisadas e professiunalas, dals centers da furmaziun da suissetec, sco er d’interpresas da la branscha da la tecnica d’edifizis
Furmaziun da basa scursanida
en ina professiun parentada, p.ex. construider / construidra da ventilaziuns AFQ, installatur sanitar / installatura sanitara AFQ u planisader / planisadra da tecnica d’edifizis AFQ
Examen professiunal (EP) p.ex. cun certificat professiunal federal
- schefmontader stgaudaments
- spezialista per sistems da chalur
- controllader da brischaders
- cussegliadra energetica edifizis
- manader da project tecnica d’edifizis e. a.
Examen professiunal superiur (EPS)
p.ex. maister / maistra da stgaudaments
Scola spezialisada superiura (SSS)
p.ex. tecnicher / tecnicra dipl. SSS tecnica d’edifizis
Scola auta spezialisada (SAS)
Direcziuns da studi en champs spezialisads parentads. P.ex. Bachelor of Science (SAS) energia da la tecnica d’edifizis. Tut tenor scola auta superiura valan differentas cundiziuns d’admissiun.
Cundiziuns da lavur
Installaturs da stgaudaments lavuran en manaschis d’installaziun da stgaudaments u en manaschis cumbinads stgaudament-ventilaziuns-installaziuns sanitaras. Els lavuran en teams pli pitschens en il lavuratori ed er sin il plazzal. Tut tenor lavur portan els equipament da segirezza sco chalzers da segirezza, egliers u chapellinas. La glieud da professiun lavura stretgamain cun architects, planisaders da la technia d’edifizis, installaturs sanitars ed electroinstallaturs, han dentant er contact cun clientella mintgatant. I po dar fasas intensivas da lavur per ch’ils termins possian vegnir resguardads.
La glieud da professiun po sa spezialisar en tschertas spartas, p.ex. en la sparta da las energias regenerablas. Cun experientscha creschenta pon els surpigliar posiziuns da responsabladad sco manadra da team u manader dal plazzal, manar ina filiala d’in manaschi pli grond u sa far independent.
Ulteriuras infurmaziuns
Schweizerisch- Liechtensteinischer Gebäudetechnikverband (suissetec)
8021 Zürich 1
URL: www.suissetec.ch