Lavurs
Spezialistas e spezialists tiran giaglinom e produceschan ovs per il commerzi a l’engrossa. Els tgiran e surveglian giaglinas, giaglinas giuvnas, pulschains e galdins, lavuran en manaschis da giaglinom u en manaschis agriculs. Els mantegnan las stallas, ils claus e las hallas da metter ovs. La charn ed ils ovs vegnan duvrads per la consumaziun directa u per la elavuraziun ulteriura e per la vendita. La Lavur dils spezialists e las spezialistas da giaglinom è pli e pli industrialisada e reglada tras prescripziuns. Intgins sa decidan per la tratga da giaglinom biologica.
Els exequeschan suandantas lavurs:
Producziun
- tschentar si in plan da producziun che correspunda al diever e las spetgas dal martgà
- controllar il stadi, la temperatura e l’illuminaziun en las stallas d’uvar, da tratga e da pulschains
- resguardar las perscripziuns e leschas, p.ex. garantir ch’i na sa chattan pli blers animals che lubì en las stallas ed ils claus
- pavlar e bavrar mintga di ils animals
- calcular las raziuns da pavel tenor la razza ed ils basegns
- administrar las reservas dal pavel
- far or d’uigl, nettegiar, dischinfectar e midar il strom ed il resgim
- prevegnir a malsognas e ad infecziuns da virus chaschunadas tras parasits e bacterias
- survegliar la sanadad dals animals e tgirar u far giu animals malsauns
- controllar la producziun dad ovs ed il temp da cuar
- esser infurmads da las tecnicas da reproducziun
- trair si pulschains ed engraschar las giaglinas giuvnas
Vendita e commerzialisaziun
- rimnar ovs, sortir tenor grondezza, pachetar e vender
- furnir charn da pulaster a grossists
- far giu animals ch’èn destinads per la vendita directa
- giuditgar la qualitad da la charn
- etichettar la charn cun infurmaziuns davart la derivanza, il label ed il pretsch
- conservar la charn en deposits da sfradentar
Mantegnair apparats ed edifizis
- mantegnair ils apparats, percorscher ils disturbis e far lavurs da reparatura usitadas
- conservar e renovar edifizis
- collavurar a projects da construcziun e da modernisaziun
Administrar il manaschi
- far la contabilitad dal manaschi, analisar ils retgavs, e custs da la producziun
- planisar las investiziuns e garantir lur finanziaziuns
- liquidar lavur administrativa
- emplenir il persunal e survegliar sia lavur
Scolaziun
Durada
3 onns
Furmaziun en la pratica
En almain dus manaschis da giaglinom
Furmaziun en scola
- 1. + 2. onn: 1-2 dis l’emna a la scola professiunala
- 3. onn: 16-20 emnas da bloc en l’Aviforum ed a la scola agricula
Roms professiunals
cultivaziun da plantas, tegnair animals, mecanisaziun ed indrizs tecnics, conturn da lavurar, rom d’elecziun
La furmaziun da basa po era vegnir absolvida cun il rom d’accent agricultura biologica.
Curs ordaifer il manaschi
segirezza a la lavur, protecziun da la sanadad, drizzar e mantegnair maschinas, igiena, garanzia da la qualitad, utilisaziun da vehichels idraulics, transport segir d’animals, intervenziuns al giaglinom
Maturitad professiunala
La furmaziun en scola vegn absolvida en curs da bloc e perquai vegn la scola da maturitad professiunala frequentada en general pir suenter la furmaziun da basa.
Diplom
Spezialist / Spezialista da giaglinom AFQ
Premissas
Furmaziun preliminara
- temp da scola obligatoric terminà
- in fufragnadi d’ina u duas emnas vegn cusseglià
Furmaziun da basa scursanida
- Cun in attest da practicist agrar (AFP), cun in attest federal da qualificaziun (AFQ) u cun ina maturitad sa scursanescha la furmaziun sco spezialist da giaglinom per regla sin 2 onns.
- Cun in attestat federal da qualificaziun (AFQ) d’in auter mastergn agricul po la furmaziun sco spezialista da giaglinom sa reducir sin 1 onn
Pretensiuns
- plaschair da lavurar cun animals
- dun d’observar, attenziun durant il contact cun ils animals
- sentiment per la lavur pratica ed intervenziun corporala
- fidadadad e perseveranza
- enclegientscha tecnica
- sanadad robusta, naginas allergias (pulvra)
- prontadad da far lavurs malnettas
- prontadad da lavurar era durant la fin d’emna
Furmaziun supplementara
Curs
purschidas da l’Aviforum e da centers da furmaziun agricula
Furmaziun supplementara
suenter avair terminà la furmaziun da basa po vegnir absolvida ina furmaziun da basa scursanida (1 onn) en in’autra professiun agricula
Examen professiunal (EP)
mainagestiun economia da giaglinom cun certificat professiunal federal u in’auter examen professiunal sin il champ professiunal da l’agricultura
Examen professiunal superiur (EPS)
maister / maistra da l’economia da giaglinom u in’auter examen professiunal superiur en il champ professiunal da l’agricultura
Scola spezialisada superiura (SSS)
agrotecnicher / agrotecnicra SSS, commerziant agricul / commerzianta agricula SSS
Scola auta spezialisada (SAS)
Bachelor of Science (SAS) en agronomia cun approfundaziun en la scienza d’animals da niz. Tut tenor scola auta valan differentas cundiziuns d’admissiun.
Cundiziuns da lavur
Spezialists da giaglinom lavuran sco experts u manaders da gestiun sin bains da giaglinom ed en manaschis da cuaditsch. Cun experientscha correspundenta pon els era lavurar sco cussegliaders en la producziun da pavel, en manaschis da la construcziun da stallas, en manaschis dal commerzi d’ovs u en manaschis d’engrasch. Els pon era lavurar en manaschis da la branscha da victualias u en labors.
Ils temps da lavur èn per il solit regulars, dentant cun servetschs da remplazzament la dumengia ed ils dis da festa. Persunas interessadas han bunas schanzas da chattar ina plazza d’emprendissadi malgrà che las plazzas d’emprendissadi èn restrenschidas. Spezialists da giaglinom han bunas perspectivas da chattar ina plazza suenter lur scolaziun.
Ulteriuras infurmaziuns
OdA AgriAliForm
5201 Brugg AG
Tel: +41 56 462 54 30
URL: www.agri-job.ch
Stiftung Aviforum
3052 Zollikofen
Tel: +41 31 915 35 35
URL: www.aviforum.ch
Gallo Suisse
8049 Zürich
URL: www.gallosuisse.ch