Lavurs
Il mastergn porscha sis direcziuns da sa spezialisar: tgira da chavals, chavaltgar classic, chavaltgar a moda da western, chavaltgar chavals da pass, cursas da chavals e charrar cun manadira. Spezialists e spezialistas da chavals da tut las direcziuns cumenzan lur scolaziun cun la tgira da chavals.
La tgira da chavals vala sco premissa per il sport a chaval cun success. Spezialists da chavals da tut las direcziuns passentan bler temp da lavur cun s’occupar da lur chavals en tgira. Els han quità dals chavals e bajegian si cun els ina relaziun da confidenza. En in center da sport a chaval u en in manaschi da commerzi pavlan e bavrentan, nettegian e muventan els ils animals. Latiers tutga la tgira da chavals malsauns e blessads, metter si bandaschas per proteger las giugadiras, nettegiar enturn ils fiers-chaval, barschunar e stregliar. Els mantegnan net e pulit las stallas, l’equipament ed il plazzament.
Spezialists da chavals da la direcziun tgira da chavals èn oravant tut responsabels per las lavurs surnumnadas. Ultra da quai sa gidan els da scolar ils animals e mussan a principiants ed a principiantas da chavaltgar.
En las direcziuns chavaltgar classic, chavaltgar a moda da western, chavaltgar chavals da pass, cursas da chavals e charrar cun manadira muventan las persunas dal fatg mintga di ils animals, per ils quals els èn responsabels. Els treneschan la tecnica da chavaltgar u da charrar, p.ex. en la dressura, en siglir u per ina cursa. Ils animals vegnan scolads cun lonschar, cun lavurar sin il terren e cun lavur manuala ed en sella.
Cun lur pazienza, lur premura e lur sensibilitad scoleschan spezialists da chavals era scolaras e scolars d’ir a chaval, en la tgira da chavals e da chavaltgar sin ils chavals. Instruir sin in livel aut è ina da lur lavurs principalas. Quai fan els cun sa tegnair vi da princips pedagogics. Durant il contact cun lur clientella patratgan ed ageschan els a moda servetschaivla.
En il mintgadi da lavur resguardan spezialists da chavals las prescripziuns da protecziun da l’animal, da la sanadad e da l’ambient. Els dismettan p.ex. il rument tenor las prescripziuns e reageschan a moda correcta e calma tar accidents.
Scolaziun
Basa legala
Ordinaziun federala dals 4-11-2013 (versiun dal 1-1-2017)
Durada
3 onns, respectivamain 2 onns per novizas/novizs
Direcziuns
- tgira da chavals
- chavaltgar classic
- chavaltgar a moda da western
- chavaltgar chavals da pass
- cursas da chavals
- charrar cun manadira
Furmaziun en la pratica
En in center per sport a chaval, en ina manaschi d’allevament u da commerzi
Furmaziun en scola
1 di per emna a la scola professiunala a Wülflingen, Zollikofen u Moudon
Roms professiunals
- garantir la segirtad e la protecziun da la sanadad, da l’animal e da l’ambient
- mantegniment da l’equipament e l’infrastructura
- tegnair, pavlar e tgirar chavals
- cussegliar ed instruir clientella
Curs ordaifer il manaschi
Tar differents temas
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "spezialist / spezialista da chavals AFQ"
Premissas
Furmaziun preliminara
- scola populara terminada
- experientschas en la tgira da chavals èn d’avantatg
Pretensiuns
- buna relaziun cun chavals (igl è d'avantatg d'avair experientscha en la demananza cun chavals)
- empatia
- senn da responsabladad
- esser equilibrà e pazient
- cumparsa segira, plaschair vi dal contact cun clientella
- abilitad da lavurar en ina gruppa
- maun per lavurs praticas, dun manual
- sanadad robusta: resistent a l’aura, naginas allergias
-
sportivadad
- pitschen pais dal corp (fin a circa 60 kg) è d’avantatg per il sport da chavals
- bunas enconuschientschas da chavaltgar
tut tenor direcziun:
Furmaziun supplementara
Curs
purschidas da scolas professiunalas, da l’organisaziun dal mund da lavur da mastergns che s’occupan cun chavals u d’associaziuns, sco p.ex. da SWISS Horse Professionals SHP, Swiss Western Riding Association SWRA, Islandpferde Vereinigung Schweiz IPV CH u dal Schweizer Rennreiter-Verband SRV
Sa spezialisar en ina direcziun
- en la direcziun elegida: p.ex. direcziun sport da chavals: titel "jockey" u "chavaltgader / chavaltgadra da chavals da cursa al trot"
- en in champ parentà: p.ex. pedagog / pedagoga da chavaltgar dipl. SG-TG / PT-CH
Furmaziun da basa scursanida
Suenter avair terminà la furmaziun da basa po vegnir absolvida ina furmaziun da basa scursanida dad 1 onn en ina da las autras 6 direcziuns.
Examen professiunal (EP)
spezialist / spezialista da la branscha da chavals cun certificat professiunal federal
Examen professiunal superiur (EPS)
expert / experta management da chavals cun diplom federal (en planisaziun)
Scola spezialisada superiura (SSS)
p.ex. Bachelor of Science (SSS) en agronomia cun spezialisaziun en la scienza da chavals
Cundiziuns da lavur
Spezialists da chavals lavuran en centers da sport a chaval u en manaschis da commerzi, tar possessurs privats ed en centers da trenament per chavals che prendan part a concurrenzas.
Ils dis da lavur cumenzan fitg baud, èn per ordinari lungs, irregulars e corporalmain stentus. Ils chavals ston era vegnir survegliads durant las fins d’emna e durant firads. Las stallas ston vegnir nettegiadas mintga di.
Tut tenor il manaschi d’emprendissadi e direcziun sa differenzieschan las cundiziuns da lavur. Il dumber da plazzas d’emprendissadi è creschida ils ultims onns perquai ch’i ha dà in lev augment da l’effectiv da chavals. La dumonda suenter spezialists è però relativamain stabila ed i vegn plitost scolà memia blers emprendists. Spezialists da chavals cun la direcziun tgira da chavals chattan en general pli svelt ina plazza che quels ch’èn sa spezialisads en ina direcziun specifica da chavaltgar.
Ulteriuras infurmaziuns
Organisation der Arbeitswelt Pferdeberufe
3000 Bern
Tel: +41 79 128 69 56
URL: www.pferdeberufe.ch
Revistas professiunalas:
"Kavallo"
"Pferdewoche"