Lavurs
Lur lavurs èn las suandantas:
Prender encunter
- differenziar materias da valur d'auters ruments, identifitgar substanzas nuschaivlas per l'ambient e definir process da separaziun e da preparaziun adattads
- registrar las furniziuns, emetter documents da pais e da furniziun, incassar taxas
- valitar ils custs da la lavur en cumparegliaziun cun la valur dal product final
Zavrar (triascha)
- valitar la qualitad dal material ad egl, cun agid da maschinas u da proceduras chemicas
- separar material net e malnet
- allontanar substanzas estras e nuschaivlas e dismetter quellas professiunalmain
- observar per quest intent adina las prescripziuns ecologicas, da sanadad e da protecziun dals lavurants
Preparar
- separar, tagliar, nettegiar e pressar il material
- duvrar per quest intent apparats mecanics, idraulics u/ed electrics sco rudellas da tagliar u tagliaders a flomma
- en gronds stabiliments d'elavuraziun da material: manipular manizzadras, apparats da tagliar idraulics e maschinas da pressar
- separar dal rest las materias da valur manizzadas cun truschadurias u cun apparats magnetics
- mantegnair maschinas ed apparats sco er far simplas reparaturas
Depositar
- depositar ils materials, tut tenor lur qualitads, en buts, en boxas, en bagnolas u en containers
- definir e controllar l'inventari da material
- organisar il transfer da material entaifer il manaschi
Chargiar
- transtgargiar e transportar las materialias cun differentas maschinas, p.ex. auzaders e tschiffaders, charrets plunaders, tschintas da transport u cranas
- chargiar camiuns, trens ed auters vehichels
Scolaziun
Durada
3 onns
Furmaziun en la pratica
En in manaschi da recicladi
Furmaziun en scola
1–2 dis a la scola professiunala spezialisada en il Center da furmaziun Limmattal ZH
Roms professiunals
- prender encunter las materias da valur
- zavrar, elavurar e deponer las materias da valur
- gestir e chargiar las materias da valur
- proteger la sanadad e garantir la segirezza a la lavur
- optimar la qualitad, la rentabilitad e la persistenza
Curs ordaifer il manaschi
Emprender la lavur pratica, approfundar ed exercitar las basas professiunalas, 17 dis durant 3 onns.
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun da basa.
Diplom
Reciclatur / Reciclatura AFQ
Premissas
Furmaziun preliminara
- terminà la scola obligatorica
Pretensiuns
- interess per la protecziun da l'ambient
- plaschair dal diever da maschinas
- chapientscha tecnica
- moda da lavurar accurata
- conscienza per la prestaziun da servetschs
- senza sturnizi
- plaschair da lavurar en il liber e da tutta aura
- sanadad robusta
Furmaziun supplementara
Curs
Purschidas da scolas professiunalas spezialisadas e da scolas spezialisadas, da la OdML Gestiun da ruments e da materias primas, da l'Institut svizzer da scolaziun per la protecziun da la natira e da l'ambient (sanu future learning sa) sco er da l'Associaziun svizra da recicladi d'atschal, da metal e da palpiri (VSMR)
Examen professiunal (EP)
Cun attestat professiunal federal, p.ex.:
- Disponent / Disponenta da transport e logistica
- Spezialist / Spezialista per stabiliments da dismessa
- Termist / Termista
- Spezialist / Spezialista da logistica
- Logisticher / Logisticra
- Spezialist / Spezialista per natira ed ambient
- Elavuratur / Elavuratura da materias primas
- Cussegliader / Cussegliadra per l'ambient
Examen professiunal superiur (EPS)
P.ex. manader / manadra da logistica dipl., supply chain manager / managera dipl. u logisticher / logisticra dipl.
Scola spezialisada superiura (SSS)
P.ex. tecnicist / tecnista da process dipl. SSS
Scola auta spezialisada (SAS)
P.ex. Bachelor of Science (SAS) en inschigneria d'ambient u en tecnologia energetica ed ecologica u bachelor of science en life sciences (SAS), direcziun da studi tecnologia d'ambient. Tut tenor la scola auta spezialisada valan differentas cundiziuns d'admissiun.
Cundiziuns da lavur
Reciclaturas e reciclaturs lavuran sulets u en pitschens teams en manaschis ch'èn spezialisads per il recicladi da tschertas materialias, p.ex. metals da fier e metals senza fier, materias primas biologicas sco palpiri u lain, materias sinteticas, textilias, materias primas mineralas sco rument da demoliziun, betun u vaider ubain apparats electronics. Ultra da quai pon els lavurar en manaschis polivalents ch'elavuran tut ils geners da ruments. Reciclaturas e reciclaturs lavuran cun differentas maschinas ed ils conturns da lavur èn per part dad aut. Els portan in equipament da protecziun cun chalzers da segirezza, guants e chapellina.
Els lavuran en grondas hallas u en il liber da tutta aura. Mintgatant van reciclaturas er tar clientas e clients per prender encunter ruments. Lur temps da lavur èn regulars, pon dentant variar tut tenor la stagiun. La branscha da recicladi crescha svelt e porscha bunas schanzas da chattar lavur. Cun in pau experientscha pon reciclaturs surpigliar posiziuns da responsabladad, p.ex. sco manadra da team u sco manader d'ina deponia da ruments en ina vischnanca u en ina interpresa.
Ulteriuras infurmaziuns
Recicladi Furmaziun Svizra
8401 Winterthur
URL: www.r-suisse.ch
OdML Gestiun da ruments e da materias primas
8401 Winterthur
URL: www.abfall-rohstoff.ch