Lavurs
Els exequeschan suandantas lavurs:
Construir instruments ad artg
- construir instruments ad artg (mo ina pitschna part da la lavur)
- construir a maun gìas ed auters instruments ad artg, sco per exempel violas da bratsch, cellos, cuntrabass (maschinas vegnan sulettamain utilisadas en la fabricaziun industriala)
- elavurar il lain cun differents utensils: cun resgias, splaunas e cuntels, cun fiers d’entagliar chavs e plats da tut las grondezzas sco era cun raspas, glimas e nizzas da trair
- duvrar lain d’ischi da muntogna per il fund, las rischlas, il culiez ed il giuf: elavurar lain da pign per la cuvrida cun las foras da resonanza, l'accordader e la trav dal bass ed elavurar lain d’eben per la claviatura
- dar la dretga grossezza a l'arvieut da la cuvrida ed al fund, splanar e nettegiar cun nizzas da trair
- storscher las rischlas –las paraids lateralas dal corp da resonanza – cun agid da schablonas en la vapur
- collar la singula tocca cun colla chauda idrosolvibla per savair prender dapart puspè instruments che basegnan ina reparatura
Reparar, restaurar ed affittar instruments ad artg
- sa spezialisar tut tenor accent da l'atelier sin la restauraziun d'instruments vegls u sin la vendita, la locaziun ed il mantegniment d’instruments ad artg e da lur accessoris
- restaurar e reparar gias, violas da bratsch, cellos e cuntrabass
- reparar instruments ad artg: remplazzar giufs ed accordaders, drizzar las claviaturas, restaurar turnigls, collar urs e sfessas, remplazzar ils chavels da l’artg
- tut tenor accent da l'atelier era s'occupar d’instruments da trair sco ghitarras e lautas
- savair sunar in instrument ad artg uschè bain che la qualitad acustica e tecnica d’in instrument po vegnir giuditgada
Scolaziun
Durada
4 onns
Furmaziun en la pratica
A la Scola da construiders da gìas a Brienz (scola professiunala a temp cumplain) u en in atelier da construcziun da gìas
Furmaziun en scola
- enconuschientschas professiunalas: a la Scola da construiders da gìas a Brienz (instrucziun en blocs)
- furmaziun generala: a la Scola da sculpturs d’objects da lain a Brienz (instrucziun en blocs)
- instrucziun instrumentala: tar musicists qualifitgads
Roms professiunals
- scienza da materials
- scienza d'utensils
- construcziun da gìas
- mecanica
- acustica
- istorgia da la musica e da la construcziun da gìas
- scienza generala d’instruments da musica
- teoria da musica
- instrucziun instrumentala
- dissegn professiunal
Curs ordaifer il manaschi
Davart differents temas, tranter auter restauraziun, mantegniment d'artgs, applicaziun da maschinas e basa da la fotografia (41 dis durant 4 onns)
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "construider / construidra da gìas da professiun"
Premissas
Furmaziun preliminara
- temp da scola obligatoric terminà
La Scola da construiders da gìas a Brienz pretenda che persunas interessadas absolvian ina procedura d’admissiun. La part pratica cumpiglia la lavur manuala cun lain, il dissegn ed il modellar. Ultra da quai ston ins savair sunar in instrument (da preferenza gìa, viola da bratsch u cello). Plinavant ston las persunas interessadas far ina controlla da l’udida e da la vesida, ina lavur en scrit ed in discurs d’examen.
La Scola da construiders da gìas a Brienz organisescha mintgamai il settember e l'october dis d'infurmaziun. Las datas exactas pon ins vesair sin la website da la scola.
Tgi che s’interessa per ina furmaziun da basa duala (furmaziun cun ina pratica professiunala en in atelier da construcziun da gìas) sto contactar la Scola da construiders da gìas a Brienz (purschidra da l’instrucziun professiunala e dals curs ordaifer il manaschi) avant che suttascriver il contract d’emprendissadi.
Pretensiuns
- inschign manual
- moda da lavur exacta
- imaginaziun spaziala
- senn per furmas e colurs
- musicalitad e bun’udida
- abilitad da sa concentrar
- pazienza e perseveranza
- buna demananza
Furmaziun supplementara
Curs
purschidas da la Scola da construiders da gìas a Brienz sco era da l’associaziun professiunala SVGB u da purschiders a l’exteriur
Examen professiunal superiur (EPS)
Maister / maistra da construcziun da gìas dipl.
Scola auta spezialisada (SAS)
Direcziuns da studi en roms parentads, p.ex. Bachelor of Arts (SAS) en design da products ed indurstira u Bachelor of Science (SAS) en tecnica da lain. Tut tenor scola auta spezialisada valan differentas cundiziuns d'admissiun.
Cundiziuns da lavur
Sper l’occupaziun en in atelier da construcziun da gìas pon construiders e construidras da gìas era lavurar en ina fatschenta da musica. Cun experientscha professiunala correspundenta pon ellas ed els er far expertisas e giudicats.
Las schanzas d’avrir in agen atelier da construcziun da gìas dependan fitg da la conjunctura.
Ulteriuras infurmaziuns
Associaziun svizra dals construiders da gìas e d’artgs SVGB
Schauenburgerstr. 37
4052 Basilea
Tel: +41 61 508 25 21
URL: www.geigenbauer.ch
Scola da construiders da gìas a Brienz
Oberdorfstrasse 94
3855 Brienz
Tel: +41 33 951 18 61
URL: www.geigenbauschule.ch