Lavurs
Spezialists e spezialistas da tgirom e textilias fabritgeschan cun agid da guaffens e maschinas adattadas rauba da tgirom e da textil, reparan e tgiran quella. Tut tenor direcziun spezialisada produceschan els products per il sport da chavals sco per exempel sellas, chavazzinas u cumets e tschintas, rauba da tgirom sco tastgas e valischs u products per l’interiur da vehichels sco sezs e tarpuns.
Els exequeschan suandantas lavurs:
Planisar lavurs
- far bainvegni a la clientella e sclerir ils basegns
- cussegliar davart l’elecziun dals products ed ils materials
- quintar la quantitad dal material, tschentar si ina glista da la tocca necessaria e far in’offerta
- designar in sboz dil toc en elavuraziun e plans detagliads da singula tocca
- concepir cun agid da dissegns, da fotografias u d’objects models da furma e musters
- sviluppar prototips per producziuns singulas ni da seria
Fabritgar products da tgirom e da textil
- tscherner tut tenor empustaziun, tgirom, textilias sco saida, launa, mangola u materials sintetics sco tgirom artifizial u taila da blatgas
- mesirar e tagliar tenor muster ils materials cun agid da guaffens, maschinas ni a maun
- perfurar, dar si la colur da basa e far guliv la tocca da tgirom u textil
- metter ensemen la tocca e cuser ella a maun u cun maschina
- emplenir ils products cun material da stgima e vatta
- fixar, tatgar, buglir u francar cun struvas tocca da metal sco anzas e fivlas u tocca da tgirom sco tschintas e curegias
- elavurar e pulir tocca producida industrialmain
Reparar e mantegnair
- reparar e remplazzar tocca donnegiada da products duvrads
- tgirar, tractar e pulir tgirom e textilias cun products adattads
- nettegiar e mantegnair guaffens e maschinas
Scolaziun
Durada
3 onns
Direcziuns spezialisadas
- equitaziun
- vehichels e tecnica
- rauba da tgirom fin
Furmaziun en la pratica
En ina sellaria, en ina sellaria da carossarias u en in manaschi da fabricaziun da rauba da tgirom
Furmaziun en scola
1 di l'emna a la scola professiunala
Cuntegn d'instrucziun
Planisaziun ed organisaziun dals pass da lavur tenor ils basegns dal martgà e da la clientella; prescripziuns davart la segirezza da la lavur e l’ecologia; determinaziun, elavuraziun e tgira da tgirom, textilias e materialias; utilisaziun e tgira dals guaffens e da las maschinas; concepziun, fabricaziun e reparaziun da products da tgirom e da textilias
Curs ordaifer il manaschi
Emprender ed exercitar a moda pratica la basa professiunala. 15-20 dis durant 3 onns.
Maturitad professiunala
Fitg bunas prestaziuns da scola permettan da frequentar la scola da maturitad professiunala durant la furmaziun da basa.
Diplom
Attestat federal da qualificaziun "spezialist / spezialista da tgirom e textilias AFQ"
Premissas
Furmaziun preliminara
- Temp da scola obligatoric terminà
Pretensiuns
- inschign manual
- senn per furmas e colurs
- talent da dissegnar
- movibladad corporala
- pazienza e perseveranza
Furmaziun supplementara
Curs
purschidas da scolas spezialisadas e scolas professiunalas sco da l'associaziun "Leder Textil Schweiz VLTS"
Examen professiunal superiur (EPS)
maister / maistra da tgirom e textilias
Scola auta spezialisada (SAS)
direcziuns da studi en champs spezials parentads, p.ex. Bachelor of Arts (SAS) en design da products e d’industria. Tut tenor scola auta spezialisada valan differentas cundiziuns d’admissiun
Cundiziuns da lavur
Spezialists e spezialistas da tgirom e textilias AFQ lavuran savens persuls u en pitschens teams en lavuratoris, garaschas, sellarias u manaschis che produceschan rauba da viagiar en serias. Glieud da professiun en la direcziun spezialisada dal sport da chavals u da rauba da tgirom fin pon lavurar en lavuratoris artisanals u industrials. Cun la direcziun spezialisada vehichels e tecnica èsi pussaivel da lavurar tar manaschis da transports privats u publics che han in grond inventari da vehichels u tar chantiers
Suenter intgins onns experientscha da lavur po la glieud da professiun lavurar sur sasezza. Las pussaivladads da lavurar èn dentant limitadas.
Ulteriuras infurmaziuns
Verband Leder Textil Schweiz VLTS
4800 Zofingen
URL: www.ig-letex.ch