Lavurs
Lur lavurs èn las suandantas:
Preparar las lavurs
- controllar e chapir l'incumbensa e las pretensiuns da la clientella
- dissegnar a maun u al computer las parts ed ils apparats da vaider che ston vegnir producidas
- calcular la surfatscha, la spessezza, la grondezza ed il volumen
- stimar la quantitad da material ed il temp
- planisar e fixar en scrit singuls pass da lavur
- tscherner e pinar ils materials ed ils meds auxiliars, p.ex. bavrolas da vaider uder da suflar u egliers da protecziun Didymium
- endrizzar las maschinas ed ils apparats da lavur, p.ex. brischaders u pignas
Fabritgar parts u apparats da vaider
- tagliar e furmar vaider cun il brischader da gas
- furmar elements da basa sco funs, urs u spiralas
- buglir ensemen singulas parts ad apparats da vaider cumplexs sco colonnas da destillaziun u bischens da sfradentar
- arder apparats da vaider en la pigna da detensiun per eliminar tensiuns en il vaider
- controllar il resultat cun in apparat da mesiraziun optic
- tagliar a maun u cun maschinas bischens e fists da vaider fraid
- elavurar parts da vaider, p.ex. cun mular, glimar u furar
- elavurar ulteriuramain surfatschas e p.ex. las surtrair cun ina liadira
- far la controlla da qualitad e guardar, sche l'empustaziun è vegnida realisada correctamain
- documentar il process da fabricaziun e las controllas
Ulteriuras activitads
- dismetter e reciclar ruments en moda ecologica
- controllar, nettegiar e mantegnair apparats, maschinas ed urdains
Scolaziun
Durada
3 onns
Furmaziun en la pratica
En in manaschi da sufladers d'apparats da vaider
Furmaziun en scola
En il Center da scola professiunala Wertheim en Germania 3 curs da bloc per onn d'emprendissadi à 3–5 emnas.
Roms professiunals
- preparar las lavurs
- elavuraziun chauda dal vaider
- elavuraziun fraida dal vaider
- terminar e controllar las lavurs
Curs ordaifer il manaschi
Emprender la lavur pratica, approfundar ed exercitar las basas professiunalas, 11 dis durant 3 onns.
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala suenter la furmaziun da basa.
Diplom
Suflader / Sufladra d'apparats da vaider AFQ
Premissas
Furmaziun preliminara
- terminà la scola obligatorica
Pretensiuns
- imaginaziun spaziala
- inschign manual
- plaschair vi da la tecnica
- svelta capacitad cumprensiva
- moda da lavur exacta
- perseveranza
Furmaziun supplementara
Curs
Dieta da spezialists en Svizra ed a l'exteriur sco er purschidas da scolas professiunalas e spezialisadas
En Germania
- Examen da maister sco suflader d'apparats da vaider,
- Inschigneria en economia direcziun tecnica da vaider,
- Tecnica da material: vaider e cheramica
Cundiziuns da lavur
Sufladras e sufladers d'apparats da vaider lavuran en l'industria chemica, farmaceutica, da victualias e da maschinas sco er en il sectur medicinal. Els èn spezialistas e spezialists fitg dumandads en Svizra ed a l'exteriur. Sufladers d'apparats da vaider lavuran per l'ina en pitschnas interpresas ch'èn spezialisadas per la producziun d'apparats da vaider scientifics. Per l'autra chattan els lavur en instituts universitars e da perscrutaziun ubain en gronds manaschis industrials che produceschan sezs lur apparats da labor. Suenter in'experientscha professiunala d'intgins onns pon sufladras d'apparats da vaider er daventar independentas e fundar in agen lavuratori.
Ulteriuras infurmaziuns
FSV Federaziun dals sufladers da vaider da la Svizra
c/o büchiglasuster Büchi AG
Gschwaderstr. 12
8610 Uster
Tel: +41 44 905 51 14
URL: www.apparateglasblaeser.ch