Lavurs
Spezialistas e spezialists da tecnologias d'infurmaziun e da communicaziun installeschan, concepeschan, tgiran e controlleschan ils sistems da computer da firmas e d'organisaziuns. Els schlian problems tecnics, sustegnan utilisaders dad ICT e cusseglian clientas tar la cumpra d'apparats ICT.
Lur lavurs èn las suandantas:
Installar e metter en funcziun
- installar e configurar apparats sco computers, stampaders, tablets e smartphones sco er sistems operativs tenor las directivas da l'interpresa, p.ex. per drizzar en in nov post da lavur
- tgirar e controllar hardware
- installar, configurar ed actualisar software ed applicaziuns
- midar la hardware, la software u la rait, p.ex. engrondir l'arcun da lavur u agiuntar ina carta da la rait
- sviluppar e documentar tests, far ils tests e schliar problems
- applitgar ed adattar programs da computer automatisads
- cooperar a projects che pertutgan l'infrastructura da la tecnologia d'infurmaziun e da communicaziun d'ina interpresa, p.ex. per dischlocar ina partiziun entaifer ina interpresa
Lavurar cun raits
- colliar cun la rait apparats ed unitads perifericas (desktops, laptops, stampaders e.u.v.) sco er servetschs sco ils servetschs cloud cun agid da cumponentas da la rait (routers, puncts d'access senza cabel)
- eliminar disturbis u trametter vinavant problems ad in spezialist
- proteger apparats cunter smanatschas (virus, malware e.u.v.), quai cun agid d'instruments da segirezza sco firewalls e programs antivirus
Support ed incumbensas administrativas
- scolar e sustegnair las utilisadras ed ils utilisaders tar l'introducziun d'instruments ICT e d'applicaziuns
- far instrucziuns da diever e glistas da controlla
- sustegnair ils utilisaders (helpdesk) per telefon u al lieu, schliar il cas independentamain u en il team u trametter vinavant il problem ad ina spezialista
- liquidar incumbensas administrativas ed empustaziuns da hardware da computer
-
eruir ils basegns da la clientella e la cussegliar tar l'acquisiziun d'apparats ICT
Scolaziun
Durada
3 onns
Furmaziun pratica professiunala
en in manaschi da servetsch, d'industria e da mastergn u en l'administraziun
Furmaziun en scola
en la scola professiunala spezialisada, 1 fin 2 dis per emna
Furmaziun da scola a temp cumplain
diversas scolas en la Svizra tudestga
Cuntegns didactics
- installar, metter en funcziun, tgirar e controllar apparats d'utilisaders ICT finals
- garantir il funcziunament dals apparats d'utilisaders ICT finals colliads
- gidar las utilisadras ed ils utilisaders a duvrar ils meds ICT
- liquidar lavurs da support ICT
Curs intermanaschials
emprender la lavur pratica, approfundar ed exercitar las basas professiunalas, 24 dis durant 3 onns
Maturitad professiunala
Sche las prestaziuns da scola èn fitg bunas, pon ins frequentar la scola da maturitad professiunala durant la furmaziun fundamentala.
Diplom
Spezialist / Spezialista dad ICT AFQ
Premissas
Furmaziun preliminara
- terminà scola obligatorica
Pretensiuns
- pensar abstract logic
- abilitad da lavurar en in team
- moda da lavurar sistematica
- senn per prestaziun da servetsch
- dun organisatoric
Furmaziun supplementara
Curs
purschidas da scolas professiunalas e da scolas spezialisadas, da scolas autas, da differentas federaziuns professiunalas sco er da furniturs da soft- e da hardware
Examen professiunal (EP)
Cun certificat professiunal federal:
- Sviluppader/-dra d'applicaziuns ICT
- Tecnicist/-a da sistem e da rait ICT
- Informaticher/-cra d'economia
- Mediamaticher/-cra
Examen professiunal superiur (EPS)
Manager/-gra ICT dipl., security expert ICT dipl.
Scola spezialisada superiura (SSS)
Studis en il sectur spezial informatica, p.ex. informaticher/-cra d'economia SSS, informaticher/-cra SSS
Scola auta spezialisada (SAS)
Studis en il sectur spezial informatica, p.ex. bachelor of science en informatica u en informatica economica. Tut tenor la scola auta spezialisada valan differentas cundiziuns d'admissiun.
Relaziuns da lavur
Spezialistas e spezialists ICT lavuran sulets ed en teams. Els han savens contact cun collavuraturs da lur interpresa, cun utilisadras u cun la clientella, ch'els tgiran independentamain u ensemen cun auters spezialists. Lur temp da lavur è da princip regular, tut tenor il manaschi poi dentant dar temps cun blera lavur.
Spezialistas e spezialists ICT pon lavurar en tut las branschas economicas, p.ex. en manaschis da servetsch, d'industria e da commerzi u en il servetsch public. Els lavuran sin ils champs sustegn tecnic u vendita, e quai entaifer ina interpresa u tar in furnitur da servetschs ICT. Cunquai che la digitalisaziun progredescha svelt, vegn la dumonda da spezialistas e spezialists ICT a s'augmentar.
Ulteriuras infurmaziuns
ICT-Furmaziun professiunala
3011 Berna
Tel: +41 58 360 55 50
URL: www.ict-berufsbildung.ch