Lavurs
Els exequeschan suandantas lavurs
Cussegliar clientella
- cussegliar persunas ch'èn restrenschidas en lur libertad da sa mover tras malsognas, accidents u mendas da naschientscha
- sclerir ensemen cun il medi, il fisioterapeut, ils purtaders dals custs e cun il client tge med d’agid ch'è adattà: protesas remplazzan in member mancant u in member che na funcziuna betg pli uschè bain; ortesas èn stgainas, corsets u solas ortopedicas che sustegnan e curregian la posiziun dal corp; meds da reabilitaziun pon sustegnair il dies da persunas en sutgas cun rodas sco era la posiziun da seser u da giaschair durant la notg
- cussegliar la clientella cun empatia ed enconuschientschas da l'anatomia e da la patologia co ch'ils meds d’agid pon simplifitgar lur mintgadi
Far meds auxiliar
- planisar, producir e documentar mintga protesa, ortesa u mintga med da reabilitaziun a moda individuala
- exequir lavur artisanala da precisiun
- duvrar differents metals, lain, materia sintetica, gip, tgirom e materials da pulstrada
- elavurar ils materials cun differentas maschinas e guaffens; navend da la maschina da cuser fin al scanner da computer
- pussibilitar als clients da purtar a moda agreabla e segira la protesa u l’ortesa cun lavurar precis e cun quità
- crear cun agid dals novs svilups tecnics agids da seser, da chaminar e da star en pe adina pli estetics e natirals
Adattar e reparar ils meds auxiliars
- adattar protesas, ortesas e meds da reabilitaziun als basegns individuals
- adattar u midar pliras giadas il cundriz durant la fasa da reabilitaziun fin ch’el correspunda optimalmain als basegns dal client
- far reparaturas dals meds d’agid ortopedics
Scolaziun
Durada
4 onns
Furmaziun en la pratica
en in lavuratori ortopedic
Furmaziun en scola
1 di l'emna a la scola professiunala a Turitg u Losanna
Roms professiunals
- ortetica
- protetica
- orto-reabilitaziun/meds da reabilitaziun
- process da lavur, garanzia da la qualitad
- segirezza da la lavur, protecziun da la sanadad e da l’ambient
- basas da las scienzas natiralas
Curs ordaifer il manaschi
Emprender ed exercitar la basa professiunala (16-20 dis durant 4 onns)
Maturitad professiunala
Tar fitg bunas prestaziuns da scola po vegnir frequentada la scola da maturitad professiunala durant la furmaziun da basa.
Diplom
Attestat federal da qualificaziun "ortopedist / ortopedista AFQ"
Premissas
Furmaziun preliminara
- temp da scola obligatoric terminà
- bunas prestaziuns en quints, fisica, dissegn, dissegn tecnic sco era lavurs manualas
Pretensiuns
- interess per dumondas medicinalas
- plaschair da lavurar cun differents materials
- enclegientscha tecnica
- inschign manual
- senn per furmas
- moda da lavurar precisa e conscienziusa
- empatia
- abilitad da communitgar e plaschair da contacts
Furmaziun supplementara
Curs
purschidas da l’Associaziun svizra dals tecnicists d'ortopedia (ASTO) sco era purschidas da scolas professiunalas spezialisads u scolas superiuras spezialisadas
A l'exteriur
purschidas da la Scola spezialisada per tecnica d'ortopedia a Dortmund, Germania
Examen professiunal (EP)
spezialist / spezialista per tecnica da reabilitaziun cun certificat professiunal federal
Examen professiunal superiur (EPS)
ortopedista dipl., experta reabilitaziun per umans impedids da vesida e tschorvs
Cundiziuns da lavur
Ortopedists ed ortopedistas lavuran en ateliers ortopedics da clinicas e centers da reabilitaziun. Els lavuran savens sur sasez u en teams pitschens. Il contact cun la clientella e cun las medias e fisioterapeuts è impurtant.
La purschida da plazzas d’emprendissadi è plitost pitschna. La professiun pretenda per quest motiv ina tscherta flexibilitad en connex cun il lieu da lavur.
Spezialists cun ina buna scolaziun èn tschertgads en Svizra ed a l’exteriur. Per incumbensa d’organisaziuns d’agid internaziunalas pon els per exempel era far servetschs a l’exteriur en territoris da guerra e da crisas.
Cun ina furmaziun supplementara correspundenta èsi pussaivel da lavurar en ina posiziun da cader en in atelier ortopedic, da surpigliar ina lavur sco manader da filiala d’in affar da vendita per meds d’agid ortopedics u da lavurar independentamain.
Ulteriuras infurmaziuns
Ortho Reha Suisse
Seefeldstrasse 283a
8008 Zürich
Tel: +41 44 545 55 85
URL: https://orthorehasuisse.ch